Home | Հայաստան | Նալբանդյան – Մամեդյարով հանդիպման շուրջ դեռ «հստակ պայմանավորվածություն չկա»

Նալբանդյան – Մամեդյարով հանդիպման շուրջ դեռ «հստակ պայմանավորվածություն չկա»

Հայաստանի և Ադրբեջանի արտգործնախարարների հանդիպում առաջիկայում նախատեսվում է, սակայն որտեղ և երբ՝ փոխարտգործնախարար Շավարշ Քոչարյանն այսօր չհստակեցրեց․ – «Երբ որ արդեն պայմանավորվածություն լինի, էդ ժամանակ էլ կհայտարարվի: Չեմ կարող ասել, քանի չկա կոնկրետ պայմանավորվածություն»: Նշենք, որ ավելի վաղ Ադրբեջանի արտգործնախարար Էլմար Մամեդյարովը չէր բացառել, որ Հայաստանի արտգործնախարար էդվարդ Նալբանդյանի հետ կարող է հանդիպել նոյեմբերի 16-ին Մոսկվայում։ Ակնկալվում է, որ նոյեմբերի կեսերին Ռուսաստանում Հայաստանի օրերին մասնակցելու համար Մոսկվայում կլինեն Հայաստանի նախագահ Սերժ Սարսգյանն ու արտգործնախարար Էդվարդ Նալբանդյանը: Ադրբեջանական լրատվամիջոցները գրեցին, թե Մամեդյարովը նոյեմբերի 16-ին Մոսկվայում հանդիպելու է ԵԱՀԿ Մինսկի խմբի համանախագահներին: Շավարշ Քոչարյանը չհստակեցրեց, թե արդյոք նախատեսված հանդիպումը կարող է կայանալ հենց այդ օրերին: Հարցին, թե հնարավոր է երկու նախագահների հանդիպում մինչև ապրիլ՝ Սերժ Սարգսյանի պաշտոնավարման ավարտը, Շավարշ Քոչարյանն արձագանքեց, թե այդ մասին «դեռ խոսակցություն չկա»: Ի՞նչ նկատի ուներ Հայաստանի նախագահը, երբ օրերս հայտարարում էր , որ Ղարաբաղի հարցի լուծումը ցավոտ լինելու: Շավարշ Քոչարյանի խոսքով՝ լուծումն առանց փոխզիջումների հնարավոր չէ պատկերացնել, սակայն այժմ փոխզիջումների մասին խոսելն իմաստ չունի․ – «Ես հրաժարվում եմ խոսել հիմա որևէ փոխզիջման մասին, որովհետև եթե մի կողմը ոչ թե խոսում ա զիջումների մասին, այլ հակառակը՝ բարձրացնում է նշաձողը, ապա խոսել հայկական կողմերին զիջումների մասին կոպիտ սխալ է: Դա կլինի հենց զիջում, այլ ոչ թե փոխզիջում: Դրա համար այն պահին, երբ որ Ադրբեջանը հայտարարեց, որ ինքը պատրաստ է ինչ-որ զիջման, ես ձեր բոլոր հարցերին կպատասխանեմ: Այսօր դուք չեք կարող նշել Ադրբեջանի, Բաքվի կողմից որևէ մեկ հայտարարություն, որ ինքը ինչ-որ բանում պատրաստ ա զիջման: Այդ դեպքում ես համարում եմ մոզոխիզմ անընդհան էս հարցը տալը»։

Check Also

Մոսկվայում քննարկվել է ռուս-հայկական հարաբերությունների թեման

Մոսկվայում անցկացվել է «Ռուս-հայկական համագործակցության արդյունքները, հեռանկարներն ու հիմնական մարտահրավերները» թեմայով գիտաժողով, որի ընթացքում քննարկվել …